Link açıqlığı

Daa bir qırımtatar qorantası soyunıñ ğayıp olması aqqında bildire


Qırımda 29 yaşında Kefe sakini Usein Seitnabiyev ğayıp oldı, dep haber ete 15 minut agentligi.

Ğayıp olğan insannıñ doğmuş qardaşı İbraim Seitnabiyevniñ bildirgenine köre, oktâbr 21-de erkek işten evge qaytqan edi, amma öyle de kelip çıqmadı.

«İşten evge cayav ketken edi. Saat 19.30 soñki kere ağama telefon ettim, evge qaytqanını ayttı. Evge kelmedi. Bundan soñra onıñ telefonı qapalı, bağ da yoq», – dep tarif etti ğayıp olğannıñ qardaşı.

O kün aqşam, İbraimniñ bildirgenine köre, ğayıp olğan adamnıñ apayı Alime politsiyağa muracaat etti.

Aqrabası Usein olğan borcları içün ğayıp olğanını tahmin ete, lâkin olmaycaq laflardan sebep de zarar köre bilecegini red etmey.

«Onıñ ğayıp olmasınıñ sebebini añlap olamayıq. Borclardan sebep olması mümkün, lâkin apayı bile bir şey bilmey. Onıñ içün emin degilim. O, atik birisi, bir yerde bir şey tüşünmeyip aytması mümkün edi. Aytqanlarına diqqat etmey», – dedi İbraim.

Ğayıp olğan Usein Seitnabiyevniñ üstünde qara sport qıyafetleri bar edi. Onıñ bulunuv yeri aqqında haberi olğan er bir insannı +7 978 895 08 33 nomerası boyunca bildirmesi rica etile.

Qırım işğalinden soñ yarımadada adamlar sıq-sıq ğayıp olıp başladı. Sentâbr 22-de Qarasuvbazar rayonında eki qırımtatarını esir aldılar. Bir afta soñra Kezlevde 25 yaşında Edem Asanov ğayıp oldı. Bir qaç künden onı asılğan alda taptılar. Oktâbr 3-te Büyük Onlar qasabasında Eskender Apselâmov ğayıp oldı. Aqşam üstü erkek Aqmescitteki Trubaçenko soqağında yaşağan kiradan çıqıp, işine yol tuttı. Lâkin işke öyle de kelmedi.

Qırım «Nazirler şurası» yanında ğayıp olğan qırımtatarlarnıñ işlerinen oğraşqan kontakt gruppası meydanğa ketirildi.

XS
SM
MD
LG