Qırım akimiyeti «referendum» keçirilgen mart 16 kününi Qırım Cumhuriyeti Künü olaraq ilân etip, onı bayram ve tatil yapacaq olalar. Böyle bir teşebbüs Qırım «Devlet şurasınıñ» prezidium toplaşuvında noyabr 5-te seslendirildi, dep haber ete Krım Media.
Bunıñ kibi madde Qırım «spikeriniñ birinci muavini» Konstantin Baharev ve «spiker muavini» Remzi İlyasov kirsetken «Qırım Cumhuriyetinde bayram ve hatıra künleri, zenaat bayramları ve diger müim künler aqqında» qanun leyhasında mevcut.
Vesiqağa binaen, Pasha, Troitsa, Oraza bayramı ve Qurban bayramı diniy bayramlar sayıla.
Bundan ğayrı, Qırımdaki müim vaqialarğa bağışlanğan hatıra sanlarını belgileme teklif etildi: yanvar 19 – Qırım devlet bayrağı künü, mart 18 – Qırım ve Aqyarnıñ Rusiye Federatsiyası terkibine qabul etüv aqqında añlaşma imzalanması künü, aprel 11 – Qırım Anayasası künü, mayıs 18 – Qırımdan sürgün olunğanlarnı añma künü, sentâbr 8 – Qırım cenkinde şehit ketken adamlarnı añma künü, dekabr 11 – natsizm qurbanları – qırımçaq ve yeudiylerni añma künü.
Qanun leyhasınıñ müelliflerinden biri Baharevniñ aytqanına köre, vesiqa daa azırlanıla ve noyabr 26-da «Devlet şurası» toplaşuvınıñ birinci oquvında baqılmasına çıqarılacaq.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
