Rusiye akimiyeti Qırımğa kirişni yasaq etken qırımtatar halqınıñ lideri Mustafa Cemilev apayını soñki sefer yazda körgen edi, Rusiyede apiste olğan oğlu ile bağ aslı da yoq.
Bunı o DePo neşirine bildirdi.
Cemilevniñ aytqanına köre, soñki kere apayını o iyün ayında körgen edi. «Biz Poloniyağa beraber barğan edik, soñra körüşmedik», – dedi Cemilev.
Hayser oğlumnen yalıñız adliyeciler laf ete. «O, Rusiyede, onıñnen bağ yoq. Adliyeci anda bar», – dep bildirdi Cemilev. Onıñ aytqanına köre, Hayserniñ apis müddetini 2 ayğa arttırdılar ve «soñra kendi qanunlarına köre mahkeme etecek olalar».
Malüm olğanı kibi, Qırımtatar halqınıñ lideri Mustafa Cemilevniñ oğlu Hayser Cemilevni Qırım SİZOsından Krasnodar ülkesine avuştırdılar. Lâkin İnsan aqları boyunca Avropa mahkemesi ve Ukraina taqiqat organlarınıñ Hayser Cemilevni azat etüv qararları bar eken.
Hayser Cemilevni 2013 senesi mayıs 27-de Bağçasaraydaki evniñ azbarında yaqaladılar. O, 44 yaşında Fevzi Edemovğa qarşı ateş açıp, onı öldürdi.
Militsiya Cinayi kodeksiniñ 115-inci maddesi 1 qısmı (aselet öldürüv) boyunca cinaiy iş açtı. Mecliste bunı muqaytsızlıq sebebinden öldürüv dep adlaylar. Aqmescitniñ Kiyev rayon mahkemesi Hayser Cemilevni apske almağa qarar berdi.
Qırım işğalinden soñ taqiqat organları onıñ işini ğayrıdan ögrenmege istediler. Bu arada Kiyevniñ Apellâtsion mahkemesi Hayserniñ areketlerini muqaytsızlıqtan öldürüv olaraq tanıp, onı azat etüv aqqında qarar aldı. İnsan aqları boyunca Avropa mahkemesi Cemilevniñ oğlunı azat etmege çağırdı. Lâkin Rusiye buña qulaq asmay.
