Ukraina prezidentiniñ insan aqları boyunca vekâletli Mustafa Cemilevniñ fikirince, işğal etilgen Qırım akimiyeti Rusiye ordusına çağıruvnı ilân etip ve celpnamelerni qırımtatar gençleri arasında tarqatıp, qırımtatarlarnı yarımadadan çıqarmaq niyetindedir, – dep haber ete çarşenbe künü, noyabr 5-de, Azatlıq Radiosı.
«Qırımtatarlar Rusiye ordusına hızmet etmeycegini añlap, Qırımnı özleri terk eterler, dep tüşüneler. Gençler ise öz qorantalarını reine olaraq qaldırmağa istemeyler, şunıñ içün qorantaları ile ketecekler. Yani, bunı qırımtatarlarnıñ ketmesi içün yapalar, böyle alda qırımtatarlarnıñ göñülli sürgünligi ola», – dep tüşüne Cemilev.
Bundan da ğayrı, Ukraina prezidentiniñ qırımtatar işleri boyunca vekâletli Mustafa Cemilev qırımtatarlardan ibaret olacaq mahsus batalyonnı teşkil etmege ğaye bar olğanını bildirdi.
«Qırımdan çıqqanlarnı Herson vilâyetinde toplamağa kerek degen bir fikir bar. Anda regionnı qoruycaq bir arbiy bölükni de teşkil etmek mümkün. Olar işğal etilgen Qırımdan ola bilecek tariklerge qarşılıqnı kösterip olurlar. Amma işbu bölükler aqqında tam qarar daa alınmadı», – dey Cemilev.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Qırım işğaline qarşı çıqqan qırımtatarlarğa nisbeten basım alâ daa etilmekte.
Evel Human Rights Watch işğal etilgen Qırımda insanlarnıñ ğayıp oluvı boyunca öz qasevetini bildirgen edi.
