«Kavkaz halqlarınıñ Rusiye kongressi» umumrusiye cemaat areketiniñ reisi Aliy Totorkulov qırımtatarlar Qırımnıñ Rusiyege qoşuluvından memnün qalğanında emindir.
Bunı o, Şimaliy Kavkaz eyiyetiniñ işğal etilgen Qırımnıñ akimiyeti ile körüşüvde bildirdi, dep haber etile Qırım «ükümeti»niñ saytında.
«Qırımnıñ ziyareti vaqtında cumhuriyet territoriyasında qırımtatarlarğa hususiy munasebet olğanını añladıq. Siz bu halqnıñ vekillerine ğayet muqayt yanaşasıñz, bu al bizni quvandıra. Sürgün etilgen halqlarnıñ aqlavı boyunca qanunnı imzalağan prezidentimizge can-yürekten minnetdarmız. Çeşit qırımtatar teşkilâtlarınıñ vekilleri ile qonuştıq, qırımtatarlar Rusiye Federatsiyasına qoşuluvından memnün qalğanını eminliknen ayta bilem. Rusiye olar içün yalıñız eyilikni itsegenini añladılar», – dedi Totorkulov.
Qırımnıñ Rusiye tarafından işğalinden soñra bir sıra uquq qorçalayıcı teşkilâtlar yarımadada insan aqlarınıñ bozuluvı ve qırımtatarlarğa nisbeten etilgen repressiyalar aqqında bildire edi.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq tanıylar.
