Qırım akimiyeti Meclisniñ maliyeviy negizini yoq etip, onıñ küçüni azlaştırmağa tırışa.
Bunı Qırım.Aqiqatqa qırımtatar milliy Meclis reisiniñ muavini Nariman Celâl, «Qırım» Fondı» etrafındaki vaziyetni izaatlap, ayttı. Fond yolbaşçılığına Qırımnıñ medeniy asabalığınıñ qoruvı boyunca «devlet komitetiniñ» teşkerüvlerinden soñ 400 biñ ruble, «Qırım» Fondı» yuridik şahısqa ise – 5 million ruble miqdarında para cezasını belgilerdiler.
«Olar endi evelden alınğan plan boyunca areket eteler, ğaliba, biz olarğa çeşit variantlarnı teklif etken edik, amma Kreml kabinetlerinde «cenk firqası» birinci yerdedir, demek. Yerli yolbaşçılıq ise «ğalip»niñ üstünligini ep köstermege istey», – dedi Nariman Celâl.
Onıñ fikrine köre, Meclisniñ ileri faaliyeti bugünki vaziyetke köre deñişecektir, ve onıñ ve Qurultay işlerinde iştirak etken insanlar öz ileri ğayretini seçecektirler.
«Amma qorqmağa acet yoq. Epimiz bugün bir sabır sınavından keçemiz», – dep tüşüne Celâl.
Meclisniñ yuridik funktsiyalarınıñ bir qısmını «Qırım» Fondı» hayriye teşkilâtı becere edi, onıñ esabında Meclisniñ merkeziy ofisi yerleşe edi, şu cümleden.
Binanı şimdi prokuratura talabı ile Qırımnıñ «medeniy asabalığınıñ qoruvı boyunca devlet komiteti» teşkerüvvlerni keçire.
