İşğal etilgen Yaltada «Za russkiy mir! Za Novorossiyu!» şiarları altında keçirilgen miting şeer sakinlerini toplamadı. Bunı Qırım.Aqiqat mühbiri noyabr 4-te bildirdi.
Mitingni «Milliy azatlıq areketi» cemaat teşkilâtı «Halq birligi künü» bayramı çerçivesinde noyabr 4-te teşkil etti.
Teşkilâtçılar bir qaç saat beklegenlerine baqmadan, tedbirde şeerniñ sakinleri çoq olmadı. Umumen mitingde elli insan iştirak etti, olardan çoqusı «Milliy azatlıq areketi» cemaat teşkilâtınıñ faalleridir.
İştirakçiler Rusiye, Qırım bayraqları ve Georgiy şeritlerinen keldiler. Bundan ğayrı, «Novorossiya – mı s toboy!», «Pomogi zemle russkoy!», «Russkiy mir – nadejda çeloveçestva!» levhaları bar edi.
Teşkilâtçılarnıñ bildirgenine köre, miting ve «Milliy azatlıq areketi» işiniñ maqsadlarından biri Vladimir Putinniñ siyasetine qol tutmaq, «inqilâp, separatist ve terroristik areketine yol bermemek», em de referendum vastasınen Rusiye Federatsiyası anayasasını deñiştirmekten ibarettir.
Miting iştirakçileri, olarnıñ aytqanına köre, AQŞ Devlet departamenti ve «Kiyev akimiyeti» Rusiyege qarşı başlağan «informatsion cenkke» qarşı küreşte iştirak etmege çağırdılar.
Mitingde bir qaç «politsiya» hadimi ve kazaklar taqımı, em de «acele yardım» maşinası bar edi.
Salı künü, noyabr 4-te, Qırımda «Halq birligi kününi» qayd ettiler. İşğal etilgen Qırımnıñ farqlı şeerlerinde qayd etilgen bayram fotoresimlerini Qırım.Aqiqat saytınıñ fotogalereyasında baqa bilesiñiz.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq tanıylar.
