Salı künü, noyabr 4-te, işğal etilgen Aqmescitte aziz Sergiy Radonejskiy adına bağçasında Qırım memurları alleya temelini qoyuv merasiminde iştirak ettiler.
İlki tereklerni Qırımnıñ öz başına ilân etilgen baş naziri Sergey Aksönov ve Qırım «spikeri» Vladimir Konstantinov oturttılar, – dep bildire Qırım.Aqiqat mühbiri.
Qırımnıñ öz başına ilân etilgen ükümet «ruporı» Krıminform saytınıñ malümatına köre, umumen bağçada doquz qayın ve beş aqçaağaç saçıldı.
Aqmescit şeer şurasınıñ deputatları 2014 senesi mayıs ayınıñ soñunda bağçağa ad berip, onıñ sıñırlarını belgilegen ediler. «Sergiy Radonejskiy – rus toprağınıñ toplayıcısı» eykeliniñ açılış tedbiri azizniñ 700 yıllığına bağışlandı.
Tedbirde eykel açılmasınıñ teşebbüsçisi olğan Rusiye Devlet dumasınıñ reisi Sergey Narışkin iştirak etti.
Salı künü, noyabr 4-te, Qırımda «Halq birligi kününi» qayd ettiler. İşğal etilgen Qırımnıñ farqlı şeerlerinde qayd etilgen bayram fotoresimlerini Qırım.Aqiqat saytınıñ fotogalereyasında baqa bilesiñiz.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq tanıylar.
