Rusiyeniñ Donbass içün azırlağan «gumanitar yardımı» ile altıncı avtokolonna noyabr 4-te Rusiye ve Ukraina sıñırından keçti. Onıñ terkibinde 100 tonnalıq yük – ilâc ve yaqarlıq ile – 20 maşina mevcut, dep bildirdi Rusiye fevqulâde vaziyetler nazirliginiñ vekili Oleg Voronov.
Rusiye tarafınıñ malümatına köre, yük resmiyleştirmesi Ukraina sıñırcıları, gümrükçileri ve OSCE vekilleriniñ nezareti altında keçti.
Kiyevniñ billdirgenine köre, Moskva gumanitar yardım mevzusında iç bir kere añlaşma tizmedi, onıñ içün Ukraina tarafı Rusiyeniñ yapqanlarını halqara añlaşmalarnı bozuv olaraq tanıy.
Avgust ve sentâbr aylarında Rusiye akimiyeti Lugansk ve Donetskke üç «gumanitar konvoynı» yollağan edi. Ukraina tarafı bunı Rusiyeniñ Ukrainağa yapqan istilâsı dep adladı.
Keçken afta da Rusiye avtokolonnası Ukraina cenüp-şarqına eki yükni yolladı.
