Link açıqlığı

Qırımda «Halq birligi künü»: Putinniñ resimleri ve «DHC» bayraqları altında ötkerildi


Noyabrniñ 4-nde ,salı künü işğal etilgen Qırımda «Devlet şurası» binası yanında Halq birligi künü - Rusiyeniñ devlet bayramı qayd etildi.

Qırım.Aqiqat mühbiri aytqanı kibi, tedbirge beş yüzge yakhın insan keldi, qollarında Rusiye, çeşit firqalar, hususan «Yedinaya Rossiya» firqasınıñ bayraqlarını, Putinniñ süretleri, Ukrainada terroristik olaraq ilân etilgen «DHC» timsallerini körmek mümkün edi. Bazı adamlar qara-sarı- beyaz tüslerde Rusiye imperatorlığınıñ bayraqlarını alıp kelgenler, bu bayraq rus milletçilerniñ timsali sayıla.

​Toplaşqanlarnıñ ögünde Qırım akimiyetiniñ vekilleri çıqışta bulundılar – Qırım «baş naziri» Sergey Aksönov ve «Devlet şurasınıñ» reberi Vladimir Konstantinov.

«Bizim Qırım imayecilerimizge minnetdarlıq bildirem, olar kerekli vaqıtta öz cesaretini, qaviy ruhunı köstergenleri içün Qırım tarihiy vatanı - Rusiye Federatsiyasına qayttı», – dep ayttı Aksönov.

Konstantinov Donbassta «DHC» ve «LHC» vekilleri ötkerilgen qanunsız saylavlarğa qol tutqanını bildirdi.

Çıqıştan soñra, rusiyeli Qırım akimiyet vekilleri parlament yanındaki Radonejskiy adına bağçada terek saçılacağını ayttılar, toplaşqanlar qırımlılar içün kontsert keçirildi.

Tedbir politsiya, kazaklar, «halq imayecisi» nezareti altında ötkerildi.

Evelden bildirilgeni kibi, Moskvada rusiyeli milletçiler teşkilâtları noyabr 4 künü Halq birligi Künü çerçivesinde «Ruslar yürüşi»ni teşkil etecekler.

XS
SM
MD
LG