Avropa Birligi Rusiye akimiyeti Qırımda bergen çetel pasportlarnı tanımay.
Bunı Avropa Birliginiñ Ukraina temsilciliginiñ matbuat kâtibi David Stulik Qırım.Aqiqat saytına bildirdi.
«Avropa Birliginiñ devlet-azaları bu çetel pasportlarını qabul etmegenlerinden sebep bunıñ kibi vesiqa saipleri şengen vizasını alamazlar. Yalıñız insaniyetlik ve milliy menfaatlar istisna sebebi olması mümkün», – dedi Stulik.
Onıñ bildirgenine köre, bunıñ kibi allarda Rusiye «çetel pasportınıñ» qırımlı saiplerine sıñırlanğan vizalar berilecek, olarnı da ayrı kâğıtta qayd etecekler.
Krasnodar ülkesiniñ qaydı ile çetel pasportını alğan sakinler de Avropa Birliginiñ sert qaidelerine uyacaqlar. Olar Rusiyedeki konsullıq müessiselerge muracaat etip, viza alacaq olsalar, olardan ep bir içki pasport ve yaşav yeri talap etilecek.
Şimdilik Rusiye çetel paspotrlarınen qırımlılarnı qabul etecek memleketler daa belli degil.
İşğal etilgen Qırım sakinlerine Rusiye çetel pasportları berilip başladı. Qırım akimiyeti qırımlılarğa Krasnodar ülkesinde qayd etilgen çetel pasportlarını berip, ğarp memurlarını aldatacaq ola.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
