Link açıqlığı

Qırımda Rusiyeden kelecek ekimlerge mesken bermege azır degiller


İşğal etilgen Qırımğa Rusiyeden ekimler kelmege istemeyler, çünki olarğa mesken berip olamaylar. Bunı bazarertesi künü, noyabr 3-de, Aqyar şeeriniñ sağlıq saqlav idaresiniñ yolbaşçısı Aleksandr Fomenko bildirdi, dep haber ete Novosti Krıma.

Fomenkonıñ sözlerine köre, yaş mütehassıslarnıñ şartlarından biri – meskenniñ olmasıdır. Faqat Aqyardа ekimler içün olğan yataqhanelerde boş yerler şimdi yoqtır.

«Bizge Rusiyeden mütehassıslar telefon aça, kelmege isteyler, amma mesken olmağanını añlap, kelmekten vazgeçeler», – dedi o.

Bunıñ ile Fomenko şunı da bildirdi ki, Aqyar hastahanelerinde 75% mütehassıs çalışa.

Onıñ aytqanı kibi, tibbiy müessiselerde terapevt, anesteziolog, reanimatolog, infektsionist ve acele yardım ekimleri yetişmey.

Fomenkonıñ sözlerine köre, bugün Qırım ekimlerniñ orta aylığı 37 biñ ruble, tibbiyet adamınıñ – 21 biñ ruble, sanitarlarnıñ – 12,5 ruble miqdarındadır.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG