Noyabr 3 künü islâm dünyası Aşure kününi qayd ete. Qırım Musulmanları diniy idaresi ve Qırım Müftisi haci Emirali Ablayev musulmanlarnı bu munasebet ile hayırlay.
Bunı QMDİ matubat hızmeti bildire.
«Cumhuriyet musulmanlarına eyilikni tileymiz. Allah 1436 senesini musulmanlar içün tınçlıq, tolerantlıq yılı olaraq etsin, yañı qorantalar qurulsın ve sağlam balalar dünyağa kelsin. Aşure künü sadaqа berile, Quran oqula, bala ve doğmuşlarnı quvandıralar ve diger hayırlı işlerni yapaylar», – denile mesacta.
Muharrem aynıñ 10-ncı kününi Aşure künü olaraq adlaylar. Bu sene Aşure künü noyabrniñ 3-ne kele. Muharrem ayı musulmanlar içün muqaddes aylardan biri ola. Muharrem ayında eñ qıymetli kün – Aşure künüdir.
Aşure kününde (em de Muharrem 9 ve 11 künleri) oraza tutmaq lâzim. Aşure künü Allah Kök, Yer, meleklerni, birinci insannı – Adamnı yarattı.
