Ukraina içki işler nazirligi ve Ukraina havfsızlıq hızmeti Donetsk ava limanında ukrain arbiylerine qarşı ateş açqan belli Rusiye oyuncısı Mihail Poreçenkovğa qarşı cinaiy taqiqatqa başladılar.
Ukrainlilerni internette qoyulğan «Mihail Poreçenkov na boyevıh pozitsiyah opolçentsev v donetskom aeroportu» adlı video açuvlandırdı.
Videoda körüne ki, oyuncı «DNR» terroristlerinen beraber bulunıp, pülemöttan ukrain arbiylerine qarşı ateş aça.
Poreçenkov terroristlerniñ «Utös» pülemötından ateş açmaq teklifine razı oldı. Bundan soñra oyuncı ava limanınıñ viranelerinde terroristlernen bir sıra foto çıqardı.
SBU matbuat hızmeti bildire ki, «DNR» terroristik faaliyetinde iştirak etüv sebebinden Ukraina Cinaiy kodeksiniñ 258-3 maddesi boyunca cinaiy taqiqat başlandı.
Bundan evel Ukraina içki işler nazirliginiñ taqiqat idaresi Cinaiy kodeksniñ 260 maddesi 4-ünci qısmı boyunca cinaiy taqiqatqa başlağan edi.
