Link açıqlığı

Ukraina, Rusiye ve Avropa Birligi gaz aqqında añlaştılar


Rusiye ve Ukraina Avropa Birliginiñ aracılığı sayesinde ukrain istimalcılarına gaz berilmesi aqqında añlaşıp, onıñ 2015 senesi mart ayına qadar şartlarını belgilediler.

İşbu añlaşma cumaaqşamı künü aqşam Brüsselde eki memleketniñ energetika nazirleri Aleksandr Novak ve Yuriy Prodan, em de Avropa komissiyasınıñ prezident muavini Günter Ettinger tarafından imzalandı. İşbu añlaşmanıñ ayrı ilâvesini «Gazprom» ve «Naftogaz Ukrainı» yolbaşçıları Aleksey Miller ve Andrey Kobarev imzaladılar, dep haber ete Azatlıq Radiosı.

İmzalanğan vesiqalarğa binaen, 2014 senesi noyabr ayından itibaren 2015 senesi mart ayına qadar Rusiye Ukrainağa biñ kubometr gaz içün 100 dollarlıq endirim berecek. Böylece, bu müddet devamında ukrain istimalcıları içün Rusiye gazınıñ fiyatı 385 dollarnı teşkil etecek, aqımdaki seneniñ soñuna qadar ise daa da ücüz olması mümkün.

Ukraina alğan gaz içün 1,45 milliard dollar Rusiyege bergen soñ, gaz berilmesi yañıdan tiklenilecek. Umumen aqımdaki seneniñ soñuna qadar 3,1 milliard dollar ödenecek. Ukrainanıñ 2013 senesi noyabr ve dekabr ayları ve 2014 senesi aprel-iyün ayları içün borcu bar. Günter Ettinger bergen malümatına köre, bu borclarnı qapatmaq içün para Avropa Birligi ve Halqara para fondundan berilecek.

Planlarğa köre, yılnıñ soñuna qadar Ukraina Rusiye gazınıñ 4 milliard kubometrini satın alacaq. Rusiye energetika naziri Aleksandr Novak bildirdi ki, Ukraina tarafı memleketniñ yaqarlıqnı ödemek sermiyası bar olğanını tasdıqladı.

Rusiye, Ukraina, Frenkistan ve Almaniya liderleri telefon subetinde gaz boyunca muzakerelerniñ neticelerinen memnün olğanlarını bildirdiler.

XS
SM
MD
LG