Qırımnıñ öz başına ilân etilgen baş naziri Sergey Aksönovnıñ bergen malümatına köre, ilk neticeler ealini cedvelge aluv tedbirlerinde ealiniñ aman-aman 100% iştirak etkenini ifadeley. Bu aqqında Aksönov «Rossiya 1» telekanalına bergen intervyüsında bildirdi, dep haber ete Qırım «ükümetiniñ» matbuat hızmeti.
«Ealini cedvel aluv tedbirleri raat keçti, belgilengen terkipke köre. Ealini cedvelge aluv tedbirlerinde Qırım Cumhuriyeti ealisiniñ aman-aman 100% iştirak etti. Tahminen 9 biñ kişi çalıştı, mahsus bölükler açılğan edi, telükesizlik talaplarına riayet etildi. İşbu tedbirler devamında bir de bir bozuvlar olmadı. Dekabr ayına qadar bizler ealini cedvelge aluvnıñ ilk neticelerini alacaqmız, mayıs 1-ne qadar ise olarnıñ resmiy neticeleri aydınlatılacaq», – dep ayttı Aksönov.
Oktâbr 14-25 künleri Rusiye işğal etilgen Qırım ealisini cedvelge aldı. Rusiye prezidenti Vladimir Putinniñ aytqanına köre, işbu tedqiq formal degil, lâkin onıñ neticeleri «yarımada inkişafı» içün müimdir.
Ukraina tışqı işler nazirligi Rusiye tışqı işler nazirligine mezkür tedbirlerge narazılıq köstergenini mektüp şeklinde bildirdi.
Qırımtatar halqınıñ lideri Mustafa Cemilev emin ki, ealini cedvelge aluv tedbirleri qırımtatarlarnı yarımadadan sürgün etme planınıñ bir parçasıdır, plannıñ ekinci qısmı – qırımtatar gençlerini Rusiye ordusına askerlikke çağırmaqtır.
