Link açıqlığı

Lavrov: Rusiye bütün vatandaşlarnıñ, şu cümleden qırımtatarlarnıñ aqlarını da qorçalay


Rusiye çetel işler naziri Sergey Lavrov Rusiye Federatsiyası «bütün vatandaşlarnıñ, şu cümleden qırımtatarlarnıñ, aq ve serbestliginiñ qorçalavına ayırı diqqat etkenini» bildirdi.

Bunı o çarşenbe künü, oktâbr 29-da, islâm taqvimi boyunca yañı yılnıñ munasebeti ile keçirilgen tedbirde bildirdi, – haber ete TASS.

«Şerikni ve onıñ menfaatını ürmet etmek, qarşılıqlı işanç seviyesiniñ arttıruvı dünya qurulışınıñ esas tendentsiyalarına riayet ete. Rusiyeniñ İslâm işbirligi teşkilâtı ile qurulğan dialognı aydınlatqan bir yanaşuvdır», – dedi o.

«Rusiye çetel işler nazirligi ve İslâm işbirligi teşkilâtınıñ baş kâtibiyeti arasında siyasiy mesleatlar muvafaqiyet ile keçti, neticeler işbirligimizniñ imkâniyetlerini arttıra, şu cümleden BMT ve diger halqara teşkilâtlarnı da qayd etmek kerek. Şu yerde aktual halqara meselelerinde fikirlerimizniñ, insan aqları ile bağlı mevamımıznıñ oşağanını da qayd etemiz», – dedi Lavrov.

«Rusiyede vatandaşlarnıñ aq ve serbestliginiñ qorçalavına, memleketimizde yaşağan halqlarnıñ, qırımtatarlarnıñ da, milliy ve medeniy adetleriniñ destegine ayırı diqqat etile. Rusiye prezidentiniñ qırımtatarlarnıñ aqlavı boyunca avalesi imzalanıldı. Tillerniñ teñ uquqlığı qanuniy sürette belgilendi. Qırım ve Aqyarnıñ 2020 senesine qadar inkişafı boyunca federal programma tasdiqlanıldı», – dedi Lavrov.

«Bu er şey insanlarnıñ ayatını bir tertipke ketirmek, Vatanında yaşağan er bir halqınıñ inkişaf etmesi içün şaraitlerniñ pekitilmesi içün yapıla»,– dedi Rusiye çetel işler naziri.

Belli olğanı kibi, insan aqları boyunca qırım eyyetiniñ arizasında qırımtatar milliy Meclisiniñ ofisinden quvulğanına ketirgen areketlerniñ hronologik cedveli aşkâr etildi.

Uquq qoruyıcılarnıñ fikrine köre, Qırımnıñ yerli akimiyeti qırımtatar milliy Meclisini yoq etecek siyasetini alıp bara.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar

XS
SM
MD
LG