Aqmescit memuriyetiniñ başı vazifesini eda etken Gennadiy Baharev Qırım «Devlet şurası» binası ve Aleksandr-Nevskiy katedral kilse arasında maşina turağınıñ açılması boyunca teklifni baqıp çıqmağa avale etti. Bunı Rusiye prezidenti Vladimir Putinniñ ziyaretine qadar yapmağa kerektir.
Bunı Qırımnıñ öz başına tayin etilgen akimiyetine yaqın olğan Krıminform saytı bildire.
Baharevniñ malümatına köre, Putinni Aqmescitte kilseniñ açılışında bekleyler.
«Çoq maşina olacaq»,– dedi memuriyetiniñ başı vazifelerini eda etken Baharev. O, tedbirniñ olacaq tarihı daa belli olmağanını qayd etti.
«Er şey avağa bağlı. Qubbelerde olğan nasıldır tutqal qurumay», – dedi Baharev.
Evel Qırımnıñ öz başına tayin etilgen baş naziri Sergey Aksönov Vladimir Putin Aleksandr-Nevskiy katedral kilseniñ ğayrıdan tiklenüvini öz nezareti aldına alğanı aqqında aytqan edi.
