Qarasuvbazar rayonınıñ Sinekamenka köyündeki 16 asırğa ait olğan camide tamir işleri keçirile. Caminiñ mihrabında saqlanılğan yazığa binayen, soñki sefer tamir işleri mında 1895 senesi yapılğan edi. Pervasız olmağan qırımlılarnı caminiñ ğayrıdan tiklenüvine isse qoşmağa çağıralar.
Bunı Qırım musulmanları diniy idaresiniñ matbuat hızmeti bildirdi.
QMDİniñ malümatına köre, bu sene oktâbr ayında musulmanlar öz ğayreti ile camini tiklemege başladılar. İlk nevbette, mında divarlarnıñ qaviyleştirilüvi, pencerelerniñ qoyulması boyunca işler yapıldı.
«Caminiñ minaresi bugünge qadar saqlanılmadı, em de onıñ eski şeklini qurmaq içün iç bir foto ya da malümat yoqtır. Caminiñ bir tarafından divarğa yaqın olğan meydançıq bar, qurucılarnıñ fikrine köre, mında minareniñ temeli edi. Bu yerde qurucılar olacaq minare içün temelni azırladılar»,– deyler matbuat hızmetinde.
Cami tiklenüviniñ teşebbüsçilerinden biri aytqanı kibi, eski caminiñ tamir işlerine para bütün Qırımdan kele. Bundan da ğayrı, cuma namazlarından birisinde QMDİ tarafından da para toplanılğan edi, neticede camige 54 biñ ruble berildi.
Tamir işlerni soñunace yapmaq içün toplanılğan para azlıq ete. Bu sebepten Qırım musulmanları 16-ncı asırğa ait olğan caminiñ saqlanılmasında yardım etmege çağıralar.
