Link açıqlığı

Ali Hamzin: yañı Şurada qırımtatarlarğa yer tapılmadı


Ukraina Yuqarı Şurasınıñ yañı terkibinde qırımtatarlarnıñ temsilciligine şaraitlerni teşkil etmediler.

Bu kibi fikirni Qırım.Aqiqat saytına qırımtatar milliy Meclisiniñ tış alâqa bölüginiñ yolbaşçısı Ali Hamzin «Blok Petra Poroşenko» firqasınıñ cedvelinde Refat Çubarovnıñ yerini izaatlap bildirdi.

«Qırımtatarlarğa yer tapılmadı. Anda tek bizim milliy yetekçimiz, itibarlı uquq qoruyıcı Mustafa Cemilev kirdi…», – dedi Hamzin.

O, saylavlarnıñ devamında yañı ukrain akimiyetiniñ vekilleri aytqan sözlerinden biraz çetleşkeni aqqında bildirdi.

«Lutsenko, Poroşenko firqasınıñ başı olıp, yevromaydan firqaları öz saylav cedvellerine birer qırımtatarını kirsetecegi aqqında aytqan edi. İstekleri olsa edi, Refat Çubarovnıñ keçmesi içün zaruriy şaraitlerni qurıp, onı birinci on insan sırasına kirsetir ediler. O mıtlaqа keçer edi», – dey Hamzin.

Oktâbr 26 künü Ukrainada müddetten evel parlament saylavları keçti. Reylerniñ 95% sayılğanından soñ, böyle neticeler aşkâr etildi: «Narodnıy Front» – 22,22%, soñra «Blok Petra Poroşenko» – 21,82%.

Qırımtatar milliy lideri Mustafa Cemilev «Blok Petra Poroşenko» firqa cedvelinde birinci beşlikte edi, Meclis reisi Refat Çubarov namzetler sırasında 71-nci edi.

XS
SM
MD
LG