Rusiyelilerniñ çoqusı memleket yolbaşçılığınıñ Ukrainağa nisbeten etken areketleri sebebinden qasevet çekeler.
Bunı Fokus neşirine «Vatandaşlıq işbirligi» rusiyeli cemaat teşkilâtınıñ reisi Svetlana Gannuşkina bildirdi.
«Bugün Rusiye vatandaşları bu vaziyet sebebinden qasevet çekeler. Qırım işğalinden başlap, «krımnaş» coşqusı ile «namkrış» duyğusı peyda oldı. İnsanlarnıñ çoqusına, hususan gençlerge bu vaziyet ğayet kergin kele», – dedi uquq qoruyıcı.
Onıñ fikrine binayen, Rusiye siyasiy ceetten büyük zararnı köre, Qırımnı işğal etip, «memleket demokratik körünmey başladı».
«Rusiye istilâcı-memleket, havflı, demokratik yolundan vazgeçken memlekettir. Medeniyet aqqında… Aqmescitte yekâne ukrain gimnaziyanıñ qapatıluvınıñ şaatı edim, medeniyet esasında eyi bir şey ola bilirmi? İqtisadiyat aqqında aytacaq olsaq, bizge iç kerek olmağan bir yükni özümizge aldıq. Ne bizim içün, ne Qırım içün iqtisadiy kâr yoqtır», – dey Gannuşkina.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar
