İşğal etilgen Qırım «prokurorı» Natalya Poklonskaya yarımadada ğayıp olğan adamlarnıñ adlarını bilmedi. Bu aqqında Avropa Şurasınıñ insan aqları boyunca Komissapı Nil Muyjniyeks «Dojd» telekanalına bildirdi.
Muyjniyeks Aqmescit ve Bağçasaraynı ziyaret etip, ticaretten tış ve diniy teşkilâtlarnıñ reberleri ve jurnalistlernen körüşti. Bundan ğayrı, qırımtatarlarnıñ liderleri, Qırım akimiyeti, şu cümleden «prokuror» Natalya Poklonskaya ile körüşüvler olıp keçti.
«Qırım ziyareti vaqtında men eki öldürüv ve üç insannıñ ğayıp oluvını ögrendim», – dedi Nil Muyjniyeks.
O, bu işlerni ögrenecek kontakt gruppasınıñ meydanğa ketirilmek kerekligini ayttı.
«Men Poklonskaya hanımından soradım, o, ğayıp olğanlarnıñ adlarını bilmey edi. Biz oña bu adlarnı berdik. Kontakt gruppası meydanğa ketirildi, menim qasevetime diqqat ayırğanları meni quvandırdı. Ziyaretimiz taqiqatnı tezleştirecek degen ümüttem. Men qıymet kesip olamayım, çünki bu işlerniñ tolu levhasını körmedim», – dedi Avropa komissarı.
Bundan evel Rusiye prezidenti yanında insan aqları boyunca Şura toplaşuvında Rusiye jurnalisti ve yazıcı Nikolay Svanidze Vladimir Putinge qırımtatarlarğa qarşı yapılğan basqı aqqında ayttı.
Putin bundan haberi olmağanını aytıp, bunı ögrenecek, dep işandırdı.
