Rusiye akimiyeti qırımtatar milliy areketi içün qoqla liderini qıdırıp başladı. Bunı Qırımtatar Milliy Meclisiniñ reisi Refat Çubarov «Ukrinform» neşirine bildirdi.
Onıñ aytqanına köre, şimdi «Rusiye akimiyeti Qırım ealisinden riayetkârlıqnıñ er künlik ifadelemesini talap ete», – dep haber ete Ukrainskaya pravda.
«Bunı yapmasañız, siz – duşmansıñız. İşğalci akimiyet oca, jurnalist, farqlı vazifelerde olğan reberlerni boysunmağa talap eteler. FSB vekilleri er kesnen «subet» keçireler. Er şey ardı-sıra keçe, «Krımnaş» sabıq tarafdarları bile problemlerge rastkele», – dedi Çubarov.
Onıñ bildirgenine köre, Rusiye akimiyeti qırımtatarlarğa qazan tatarlar üzerinden basqı etmek ğayesinden vazgeçti.
«FSB qırımtatarlar – tarihiy taqdir ve rejimge qarşı küreş tecribesine köre – Rusiyeniñ tatar, türk ya da musulman aleminde yolbaşçılıq ete bilgenlerini añlap, akimiyet içün telüke olması mümkün degen neticege keldi. Bizler ise bnı tüşünmedik bile», – dep ayttı Çubarov.
Onıñ fikirince, şimdi Rusiye «çeçen stsenariyine» ümüt besley.
«Olar halq üzerinde nezaretni kefil etecek insannı qırımtatarlar arasında qıdıralar. Ramzan Kadırov kibi insanlarnı. Rusiye akimiyetiniñ yalıñız Çeçenistanda meydanğa ketirilgen qoqlalar akimiyeti ile munasebeti olur», – dep tüşüne Meclis reisi.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
