Link açıqlığı

Cemilev Poroşenkonıñ Qırım işleri boyunca nazirlikni meydanğa ketirek niyetleri aqqında tarif etti


Ukraina prezidenti Petro Poroşenko Rusiye tarafından işğal etilgen yarımadanı Ukrainağa keri qaytarılmasınen oğraşacaq Qırım işleri boyunca Nazirlikniñ meydanğa ketirilmesini müim olaraq tanıy.

Bu aqqında nevbetten tış parlament saylavlarında Petro Poroşenkonıñ Blokundan namzet köstergen, Ukraina halq deputatı, qırımtatarlarnıñ lideri Mustafa Cemilev Qırım.Aqiqat saytına bildirdi.

Halq deputatı Nazirler şurası yanındaki Qırım işleri boyunca Devlet hızmeti aqqında ayttı, lâkin şimdilik onıñ vekâleti ve vazifeleri belgilenmedi.

«Bu hızmet yalıñız Qırım ya da memleket içinde köçip kelgen insanlarnıñ meselelerinen oğraşacaq mevzusında muzakereler devam ete. Prezidentniñ fikirince, Qırım işgleri boyunca Nazirlikni meydanğa ketirmek kerek, ve bu doğrudır», – ayttı Cemilev.

Petro Poroşenko Blokunıñ cedvelinden yañı parlamentke keçken halq deputatı Pavlo Rozenko Qırım.Aqiqatqa bergen malümatına köre, onıñ firqısı yañı Yuqarı Radada Qırımnıñ qaytarılmasınen bağlı bir sıra tedbirler yapacaq.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG