Link açıqlığı

Rusiyeli ekspert: Qırımğa Rusiyeden radikal islâm tarafdarları keleler


İşğal etilgen Qırım akimiyetine «cumhuriyetke radikal keyfi olğan islâm teşkilâtlarınıñ sıq-sıq kelmesine diqqat ayırmaq» teklif ettiler. Bunı bazarertesi künü, oktâbr 27-de, Krıminforda ötkerilgen matbuat-konferentsiyası devamında Strategik taqiqatlarnıñ Rusiye institutınıñ ilmiy hadimi Galina Hizriyeva bildirdi.

O, «mahsus diqqatnı» eki teşkilâtqa ayırmaq kerek olğanını qayd etti.

«Qırımğa er vaqıt Rusiye müftiler şurasınıñ insanları kele. Bu teşkilâtqa olğan ürmetime baqmadan, olarnı Rusiyeniñ temeli olaraq tanımayım. Kendi maqsatları bar, kendi vazifeleri, parallel ayatı», – dey ekspert.

O şunı da qayd etti ki, bu qasevetni doğurğan yekâne teşkilât degildir.

«Mında «Hizb ut-Tahrir» firqasınıñ seviyesinde olğan yolbaşçılar da kele. Olar gizli sürette kele, babalar ile raatlanmağa, arqadaşları ile subetleşmek. Olar añlı rus tilli müitinde yaşap, tecribeli teşviqatçı olalar», – qayd etti Hizriyeva.

O şunı da qayd etti, «Qırım akimiyeti, menimce, buña endi diqqat etmelidir. Rusiyeden mında vahhabitlerniñ kelmesi aqqında daa bir şey aytmayım, çünki olarnı daa öz közümnen körmedim».

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG