Link açıqlığı

Aksönov – SBUnıñ oña qarşı açqan cinaiy işi aqqında: «aqıldan ayırılğannıñ saçmalığı»


Qırımnıñ öz başına tayin etilgen baş naziri Sergey Aksönov Ukraina havfsızlıq hızmetiniñ reisi Valentin Nalıvayçenkonıñ qırım akimiyetiniñ yolbaşçılarına qarşı açılğan yañı cinaiy işler aqqında bildirüvini «aqıldan ayırılğannıñ saçmalığı» olaraq adladı, – dep haber ete Qırımnıñ öz başına tayin etilgen akimiyetine yaqın olğan Krıminform saytı.

«Köpek ne yapacağını bilmegen vaqıtta yapqanını bilesiñiz. Aqıldan ayırılğannıñ saçmalığıdır. Daa bir işni açsınlar, 150 iş bar, 151-nci olsun. Olarğa kerek olsa, yapsınlar»,– dedi Aksönov.

Cinaiy işlerniñ taqiqatınen oğraşqan Ukraina temsilcileri onıñ ile bağlandılarmı degen sualge Aksönov «yoq» dedi, – dep yaza neşir.

Evel Qırım prokurorı Natalya Poklonskaya Ukraina uquq qoruyıcı organlarından iç bir bildirüv almağanını bildirgen edi.

Belli olğanı kibi, Ukraina havfsızlıq hızmetiniñ reisi Valentin Nalıvayçenko oktâbr 24 künü Kiyevde brifing devamında Qırımnıñ öz başına tayin etilgen baş nazir Sergey Aksönov ve spiker Vladimir Konstantinovğa qarşı cinaiy işlerniñ açılması aqqında bildirgen edi.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG