İşğal etilgen Qırımnıñ şifahanelerinde Samara vilâyetiniñ içtimaiy-demografik ve aileviy siyaset nazirligi 1330 yollanmanı satın aldı, – dep haber etti oktâbr 27 künü Qırımnıñ öz başına tayin etilgen akimiyetiniñ «ruporı» Krıminform saytı.
Malüm olğanı kibi, 49,9 mln rublege satın alınğan yollanmalar qan donümi ile bağlı olğan hastalar içün olacaqtır.
Tahminlerge köre, Samara filâyetiniñ sаkinleri dekabr 20-ne qadar Qırım şifahanelerinde fizioterapiya boyunca tedaviylev kursını körecekler.
Şartlardan biri – şifahanelerde basseynlerniñ olmasıdır.
«Tedaviylev 18 kün devam etecek. Şifahanede bir künlik tedaviylevniñ fiyatı 976,3 ruble turacaqtır. Yollanmanıñ fiyatına Qırımğa ve keri uçağ parası da kire», – denile beyanatta.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
