Keriç parom keçitiniñ yük ve yolcu yolağı dörtünci kün çalışmay. Keçitte maşinalardan nevbet ep artmaqta.
Bunı Yekâne naqliyat müdirliginiñ matbuat hızmeti bildire.
Müessiseniñ malümatına köre, Keriç boğazından keçken kün devamında iç bir sefer yapılmadı.
«Al-azırda Novorossiysk limanında nevbette 250 yük maşinası, Keriç balıq limanında – 460 yük maşinası turmaqta. «Kavkaz» limanınıñ yolcu yolağında 320 maşina, «Krım» limanında – 245 avto nevbetni bekley», – deyler müdirlikte.
Müessisede qayd etkenleri kibi, yük ve yolcu yolaqları ava şaraitlerniñ eyileşüvine qadar qapalı olacaq. Saba, oktâbr 27 künü, Keriç boğazında yel suratı 15-20 m/s, deñizniñ dalğalanuvı 15-25 dm edi.
Qırımda furtuna havfı oktâbr 27 kününe qadar ilân etilgendir.
