Almaniya Ukraina vatandaşları içün çoq müddetli viza parasını lâğu ete.
Bu aqqında Azatlıq Radiosı Ukraina tışqı işler nazirligine esaslanıp bildire.
«Almaniya Federati Cumhuriyeti 2014 senesi noyabr 1-den itibaren emek, oquv, qoranta quruv ve diger maqsatlarda milliy devamlı viza resmiyleştirilmesi içün paranı lâğu etti. İşbu qarar yalıñız Ukraina vatandaşları içün Ukraina nazirler şurasınıñ «Almaniya Federativ Cumhuriyeti vatandaşınıñ Ukrainağa kirmek içün devamlı viza resmiyleştirilmesi aqqında» № 1016-r 22.10.2014 buyruğına köre qabul etildi», – aytıla beyanatta.
Ukraina tışqı işler naziri Pavlo Klimkin bu vizalarnı turistik vizalardan farq etmege çağırdı.
«Almaniya Ukraina vatandaşları içün devamlı milliy viza parasını lâğu etti. Müim bir adım. Lâkin farqına barıñız: bu bedava şengen degildir», – dep qayd etti o.
MİD malümatına köre, Almaniya Latviya, Litva, Estoniya, Slovakiya ve Poloniyadan soñra üç aydan ziyade müddetlik vizalarnı resmiyleştirüv parasını lâğu etken Avropa Birliginiñ altıncı memleketi oldı.
