Qırımtatar Milliy Meclisiniñ reisi Refat Çubarov dey ki, Türkiye belli bir sebeplerden Qırımnıñ Ukrainağa keri qaytarılmasınıñ teşebbüsçisi olmay. Ukrinform malümatına köre, Çubarov Parijdeki Ukraina diasporası ile körüşip, neşir mühbiriniñ sualine aynı böyle cevap berdi.
«Qırım vaziyeti ve Rusiyeniñ istilâsı aqqında, Türkiye belli bir sebeplerden yarımadanıñ Ukrainağa keri qaytarılması mevzusında liderlik yerlerini almaycaq. Lâkin Türkiye Avropa Birligi siyasetiniñ yolu ve Ukrainanıñ topraq bütünligine er daim qol tutacaq», – dep ayttı Çubarov.
Onıñ bildirgenine köre, Ankaranıñ «teraze tablasında» farqlı iqtisadiy, regional ve siyasiy menfaatlar mevcut.
«Türkiye-Rusiye munasebetlerinen bağlı büyük zıddiyetler bar, içki siyaset, Suriye ile munasebetlerde problemler, İran meselesi, onıñ içün belli bir sebepler bar, zıddiyetler sisteması, Türkiyege bundan ziyade faal olmağa imkân bermeycekler», – dep qayd etti o.
Refat Çubarovnıñ qayd etkenine köre, Türkiyede yaşağan turk ve etnik qırımtatarlar Ukrainanıñ topraq bütünligine qol tutacaqlar ve qırımtatarlarnıñ taqdiri olarnı qasevetlendirecek. «Biz olarğa minnetdarmız», – dep qayd etti Meclis reisi.
O, qırımtatarlar Türkiye ile sıq bağ tutqanlarını bildire.
«Bizim Türkiyede küçlü bir diasporamız bar. Farqlı malümatlarğa köre, onıñ sayısı 3-6 million insannı teşkil etmesi mümkün. Lâkin onıñ ekseriyeti kendini Qırımdan çıqqan adamlar olaraq tanıtmay, lâkin cemiyetlerge birleşkenler adamlar (yüz biñlernen) Türkiyede müim bir rol oynaylar. Bir çoq siyasetçi olarnıñ fikirlerine emiyet bere», – dep bildirdi Çubarov.
Refat Çubarov Frenkistanda Ukraina eyyetiniñ erkânında bar edi. O, UNESCO İcra keñeşiniñ 195-inci sessiya işinde iştirak etti. Neşir malümatına köre, işbu teşkilâtnıñ reber organı reylerniñ çoqluğınen Ukrainanıñ topraq bütünligini isbatlap, «UNESCO tarafından Qırım Muhtar Cumhuriyetinde (Ukraina) monitoring» rezolütsiyasını tasdıqladı.
