İşğal etilgen Qırım akimiyeti qırımtatarlarnıñ iradesini yoq etmege tırışa.
Bunı RFI neşirine qırımtatar milliy Meclis reisi Refat Çubarov bildirdi.
«İşğalci akimiyet qırımtatarlarnıñ siyasiy iradesini yoq etmek içün çeşit ayırımlarnı qullana ve böyleliknen olarnı özüne boysundırmağa çalışa», – dedi Çubarov.
Böyleliknen o, oktâbr 22 künü qırımtatar faaliyetçi Tair Smedlâyevniñ yaqalanuvını izaatladı.
«Bu insannı, onıñ yaqın aqrabalarını yahşı bilem. Ve Smedlâyev Türkiyeniñ belli tarihçı İlbir Ortaylınıñ torunı olğanını da qayd etmek isteyim», – dedi Çubarov.
Qırımtatarlarnıñ evlerinde tintüv ve yaqalanuvlar devam ete. Çarşenbe künü, oktâbr 22-de, Eski Qırımda politsiya hadimleri Qurultaynıñ Merkeziy saylav komissiya reisi, qırımtatar faaliyetçi Zair Smedlâyevniñ qardaşını Tair Smedlâyevni yaqaladılar. Maşinasını politsiya hadimleri taqip ete edi, oña toqtatmağa emir ettiler, soñra ise blok etip, özlerini tanıttılar. Soñra onı Aqmescitte Franko caddesinde vaqtınca bulunuv izolâtorına ketirdiler.
Hatırlatamız, keçken afta Qurman qasabasında eki qırımtatarnı yaqaladılar. Olarnı qırımtatar milliy lideri Mustafa Cemilevni mayıs 3 künü Ermeni-Bazarda qarşılav tedbiri vaqtında uquq qorçalayıcı organlarnıñ hadimlerine zarar ketirgenine qabaatlaylar. İnsanlarnı Rusiyeniñ FSB SİZOsında tutalar.
