Link açıqlığı

Tair Smedlâyevniñ adliyecisi: mahkeme qararı işniñ ne derecede siyasiy olğanını kösterecek


Cuma künü, oktâbr 24-de, işğal etilgen Qırımda yaqalanğan faalli Tair Smedlâyevniñ işi boyunca mahkeme toplaşuvı olacaq. Onı «akimiyet vekiline zarar ketirgeni»nde qabaatlaylar. Adliyeci Emil Kürbedinov aytqanı kibi, mahkeme toplaşuvı Tair Smedlâyevge nisbeten adaletlik seviyesini kösterecektir.

Bunı o Qırım.Aqiqat saytına bildirdi.

«Mahkeme taqiqat tedbirlerniñ yönelişi uquqiy olğanını ya da olmağanını kösterecek. Apiske almaq kibi qarar qabul etilse, onıñ işi siyasiy olğanı belli olacaq. Adliyeci olaraq men böyle tüşünem, – dey o. – Bu aqta Rusiye Federatsiyasınıñ Anayasa mahkemesi da bildirgen edi, yani mında apiske almaq kibi qarar ne zaman alınmaq kerekligi doğrudan yazılğandır. Bu qararnı tair Smedlâyevge qarşı qullanmaq iç te acet yoq».

Yaqalanğannıñ ağası Zair Smedlâyev aytqanı kibi, aqiqatnı qorumaq içün Rusiyede olğan bütün mahkeme instantsiyalarğa muracaat etilecektir.

Çarşenbe künü, oktâbr 22-de, Eski Qırımda politsiya hadimleri Qurultaynıñ Merkeziy saylav komissiya reisi, qırımtatar faaliyetçi Zair Smedlâyevniñ qardaşını Tair Smedlâyevni yaqaladılar. Maşinasını politsiya hadimleri taqip ete edi, oña toqtatmağa emir ettiler, soñra ise blok etip, özlerini tanıttılar. Soñra onı Aqmescitte Franko caddesinde vaqtınca bulunuv izolâtorına ketirdiler.

XS
SM
MD
LG