Yaqında qırımtatarlarnıñ milliy yetekçisi Mustafa Cemilevniñ Türkiye baş naziri Ahmet Davutoğlu ile körüşüvi keçecek, mında yarımadada yaşağan qırımtatarlarğa kösterilgen basım da muzakere etilecek.
Bunı Cemilev Qırım.Aqiqat saytına bildirdi.
«Maña baş nazir adından telefon açıp, biznen körüşmek istegeni aqqında bildirdiler, amma vaqtını daa aytmadılar. Barsaq, muzakere etecekmiz. Şimdi yalıñız ayırımlar ile bağlı meseleler degil de, diger problemler de bar», – dedi Cemilev.
Meclisniñ sabıq reisi Qırımda Tair Smedlâyevniñ yaqalanuvını da izaatladı. O, Smedlâyevge olğan qabaatlarnı «saçmalıq» olaraq adladı.
«Kimse iç bir kimsege beden zararlarnı ketirmegen edi. Birinciden, olar (uquq qoruycı organlarnıñ hadimleri – muar.) anda – bizim toprağımızda qanunsız sürette buluna ediler.Biz olarnı cezalay bilemiz, çünki olar insanlarğa Ukrainanıñ qıtaiy qısmına keçmege yasaq ete ediler», – dedi Cemilev.
O, «sıñırnıñ keçüvi» ile bağlı qabaat da temelsiz olğanını tüşüne.
«Aqiqaten, sıñır yoqtır. Qırım yarımadası bölünmez Ukrainanıñ qısmıdır. Şunıñ içün olarnıñ er angi qararlarına insan aqları boyunca Avropa mahkemesinde itiraz köstermek mümkün ve Rusiyege qarşı mıtlaqa cezalar olacaqtır», – qayd etti Cemilev.
Çarşenbe künü, oktâbr 22-de, Eski Qırımda politsiya hadimleri Qurultaynıñ Merkeziy saylav komissiya reisi, qırımtatar faaliyetçi Zair Smedlâyevniñ qardaşını Tair Smedlâyevni yaqaladılar. Maşinasını politsiya hadimleri taqip ete edi, oña toqtatmağa emir ettiler, soñra ise blok etip, özlerini tanıttılar. Soñra onı Aqmescitte Franko caddesinde vaqtınca bulunuv izolâtorına ketirdiler.
Cuma künü, oktâbr 24-de, Tair Smedlâyevge mahkeme tarafından ceza belgilenmeli.
