Ukrainada taqiqat organlar Qırımda ukrainalılarnıñ aqlarını bozğan işğalci akimiyet vekilleri, mahkemeci, uquq qoruyıcı ve Qırımnıñ icra hızmet hadimlerine qarşı bir sıra cinaiy işler açtılar. İşbu işler boyunca qararlar ğıyabiy şekilde çıqarıldı.
Bu aqqında Adalet naziri Pavlo Petrenko oktâbr 23-te brifingde bildirdi.
Adalet naziriniñ bergen malümatına köre, cinaiy işler Ukraina cinaiy kodeksiniñ 109-ıncı ve 10-uncı maddeleri boyunca açıldı. Bu areketler anayasa qurumı, devlet akimiyetini zapt etüv, Ukrainanıñ topraq bütünligi ve mustaqilligini bozmaq maqsadında yapıla.
Bundan ğayrı, prokuraturağa cinaiy işler açılğan şahıslarnıñ Ukrainadaki mal-mülkini tevqif etüv aqqında muracaat berildi.
Pavlo Petrenkonıñ qayd etkenine köre, mezkür şahıslar içün cezanı belgilemek içün olarnıñ kelmesi de kerekmey.
Malüm olğanı kibi, Ukrainada ğıyabiy cinaiy taqiqat aqqında qanun mevcut. Oña binaen, devletke qarşı ve qabarcılıq cinayetlerni yapqan adamlar cezalana bile.
Onıñ aytqanına köre, al-azırda Qırımda saqlanıp, Ukraina vatandaşlarınıñ aqlarını bozğan şahıslar ep bir ceza çekecekler.
Adalet naziriniñ malümatına köre, yaqınlaşqan parlament saylavlarına baqmadan, ükümet yarımada problemlerinen oğraşmağa devam ete ve İnsan aqları boyunca Avropa mahkemesinde bunıñnen bağlı mahkeme işlerini baqa.
Bundan ğayrı, Adalet nazirliginiñ yolbaşçısı dedi ki, Qırımnıñ Ukrainağa keri qaytarılması Ukraina akimiyeti içün eñ müim vazifelerinden biri qalmaq kerek.
2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Em Ukraina, em Avropa Birligi, em de Amerika Qoşma Ştatları işbu rey berüvni tanımadılar.
