«Ukrainskaya pravda» neşiriniñ yañı baş muarriri qırımtatar jurnalisti Sevgil Musayeva oldı. Bunı neşirniñ baş muarriri ve saibi Alöna Pritula Facebook içtimaiy ağında bildirdi.
Alöna Pritulanıñ bildirgenine köre, «keyfiyetli jurnalistikanen meraqlanğan insanlar» Musayevanıñ adını bileler.
Onıñ qayd etkenine köre, muarririyet deñişmeleri «Ukrainskaya pravda» neşirinden Mustafa Nayyem ve Sergey Leşçenko kibi meşur müelliflerniñ siyasetke ketkenlerinen bağlıdır.
«Bizler eñ eyi insanlarımıznı parlamentke berdik. Olarnıñ yerine cesür, er şeynen meraqlanğan ve aqıllı insanlar kele. «Ukrainskaya pravdanı» yañı seviyege kötermek içün. Bizler memleketniñ birinci saytı olıp qalamız, lâkin çoqtan deñişmegen edik. Yañı ğaye ve bilgilernen insanlar keldi, olarnıñ közleri yana, olar memleketni deñiştirecek, zenaatında kendi izini qaldıracaq olalar», – dep yazdı Alöna Pritula.
«15 minut» saytı bergen malümatqa köre, Sevgil Musayeva – milleti qırımtatarı olğan ukrain jurnalistidir. 2011-2013 seneleri o, «Forbes Ukraina» mecmuasınıñ mühbiri edi, 2014 senesi Hubs iş internet-neşirini açtı ve onıñ baş muarriri olğan edi. Beş kere «Premiya delovıh krugov PRESSzvaniye» mukâfatını alğan edi.
«Ukrainskaya pravda» Ukrainanıñ eñ meşur internet-neşirlerinden biri ola. Er kün onı aman-aman 800 biñ insan oquy.
