İşğal etilgen Qırımda arbiyler qırımtatarlarnıñ evlerinde tintüv keçirmege devam eteler. Cumaaqşam künü, oktâbr 23-te, Qırım «politsiyası» Aqmescit şeeriniñ sakini Ernest Usmanovnıñ evine keldi.
Bunı Ernest Usmanov Facebook saifesinde bildirdi. Bundan soñra o içtimaiy ağlarda bağğa çıqmadı.
Birazdan Usmanovnıñ evinde keçirilgen tintüv aqqında belli Qırım faali, bloger Yelizaveta Bogutskaya bildirdi.
Qırım.Aqiqat saytı Ernest Usmanovnıñ soy-soplarınen bağlanıp olamadı. Qırımtatarlarnıñ evlerinde tintüvler devam ete, qırımtatarlarnı apiske alalar.
Malüm olğanı kibi, oktâbr 22-de Eski Qırımda politsiya hadimleri tarafından yaqalanğan qırımtatar faali Tair Smedlâyev Aqmescitteki Franko bulvarında yerleşken vaqtınca tutuv izolâtorına ketirildi. Yaqalanğan adamnıñ ağası – Qurultaynıñ Merkeziy saylav komissiya reisi Zair Smedlâyev Qırım.Aqiqatqa bergen malümatına köre, Tair yaramadı.
Hatırlatamız, işğal etilgen Qırımda Qurman qasabasında eki qırımtatarını yaqalap, apiske aldılar. Olarnı mayıs 3-te Ermeni Bazarda qırımtatar halqınıñ lideri Mustafa Cemilevni qarşılağan vaqıtta uquq qoruyıcı organlarnıñ hadimlerine ketirilgen zararda şekleyler.
