Link açıqlığı

Yaqalanğan qırımtatar faaline cuma künü ceza belgilenecek


Cuma künü, oktâbr 24-te, Qırımda oktâbr 22-de yaqalanğan qırımtatar faali Tair Smedlâyev içün cezanı belgileycek mahkeme toplaşuvı keçirilecek.

Bu aqqında Qurultay Merkeziy saylav komissiyasınıñ reisi, yaqalanğannıñ ağası Zair Smedlâyev Qırım.Aqiqat saytına bildirdi.

«Onı 318-inci madde boyunca cezalaycaq olalar – akimiyet vekiline qarşı areketler. O, Aqmescitte İVS binasında buluna. Şimdi taqiqat tedbirleri keçirile, adliyecilernen çalışamız», – dep ayttı Zair Smedlâyev.

O, qardaşınıñ alını daa bilmey. Tünevin o yaramağan edi. Zair Smedlâyev qardaşınıñ onıñ adliyecisi ile körüşüvinden soñ onıñ alını ögrenmege niyetlene.

Smedlâyevniñ aytqanına köre, bu vaziyette yarımadada ne olacağını tahmin etmek zordır.

Onıñ qayd etkenine köre, bu meselede yalıñız «Allah yardımına ve halqara cemaatına» ümüt etmek mümkün.

Qırım.Aqiqat bergen malümatına köre,Oktâbr 22-de Eski Qırımda politsiya hadimleri tarafından yaqalanğan qırımtatar faali Tair Smedlâyev Aqmescitteki Franko bulvarında yerleşken vaqtınca tutuv izolâtorına ketirildi.

Hatırlatamız, işğal etilgen Qırımda Qurman qasabasında eki qırımtatarını yaqalap, apiske aldılar. Olarnı mayıs 3-te Ermeni Bazarda qırımtatar halqınıñ lideri Mustafa Cemilevni qarşılağan vaqıtta uquq qoruyıcı organlarnıñ hadimlerine ketirilgen zararda şekleyler.

XS
SM
MD
LG