Qırımtatarlar Rusiye Federatsiyası Silâlı quvetlerine askerlikke çağırılmaq kerek, dep tüşüne «Qırım birligi» cemaat teşkilâtınıñ reisi Seytumer Nimetullayev.
Bu aqqında Qırımnıñ öz başına ilân etilgen akimiyetine yaqın olğan Krıminform saytı bildire.
Nimetullayevniñ bildirgenine köre, Qırımtatar Milliy Meclisiniñ liderleri yañlış malümatnı tarqatıp, semetdeşlerni Rusiye ordusında hızmet etmekten vazgeçmege çağıralar.
«Bizler (qırımtatarlar – muarrir) Rusiye qanunları boyunca yaşasaq, Rusiye ordusınıñ saflarında hızmet etmelimiz. 18 yaşını toldurğan balalarımız asker olmalı», – dep ayttı cemaat teşkilâtınıñ reisi.
Oña köre, qırımtatarlar askerlikte hızmet etip, Rusiye aliy oquv yurtlarına imtiyazlı olaraq oqumağa kire bileler, em de uquq qoruyıcı organlar ve devlet strukturalarında çalışa bileler.
Qırımtatar halqınıñ lideri Mustafa Cemilev Qırım ealisini cedvelge aluv qırımtatar oğlanlarını askerlikke çağırmaq içün kerek olğanını tahmin etken edi.
«Qırım birligi» teşkilâtı Rusiyeniñ Qırım işğalinden soñ meydanğa ketirildi. Közeticilerniñ zanınca, bu teşkilâtnı Qırımtatar Milliy Meclisiniñ alternativası olaraq köre ediler.
