Qırımtatar Milliy Meclisiniñ reberligi Qırım regionlarını ziyaret etip, yerli faallernen körüşecek ve bugünki vaziyetni muzakere etecek ola. Böyle bir qarar oktâbr 22-de regional meclis reisleriniñ toplaşuvında qabul etildi, dep bildire QHA agentligi.
«Bizler çoqtan toplaşmadıq, faaliyetimiz belli bir müddette körünmesin dedik, çükni Meclis qapatılmasınıñ telükesi bar edi», – dep ayttı Meclis reisiniñ muavini Nariman Celâl.
«Yaqın zamanda Meclis reberligi, onıñ vekilleri ya da Meclis idare reberleri regionlarnı ziyaret etip, yerli faaller – regional Meclis, din cemiyetleriniñ azaları, faaller, yani rayonnıñ faal qısmı ile körüşecekler», – dedi Celâl.
Onıñ aytqanına köre, işbu toplaşuvlarnıñ maqsadı – olıp keçken adise-vaqialar aqqında tarif etmek, yerli ealiniñ problemlerini ögrenmektir.
Uquq qorçalayıcı teşkilâtlar Rusiye tarafından işğal etilgen Qırımda qırımtatarlarğa qarşı basqı quvetleşkenini bildireler.
Qırım alan missiyası sentâbr ayında aydınlatqan nezaret neticelerine köre, Qırımnıñ yerli akimiyeti Meclisni onıñ binasından çıqarıp, qırımtatar halqınıñ temsil organını yoq etmege tırışa.
