İşğal etilgen Aqyarda qızdıruv mevsiminiñ başlanuvınen suv masrafı künde 5 biñ kubometrge arttı. Şunıñ içün Çernokeriç suv anbarında suv yedegi bir ayğa yetecektir.
Bunı Aqyar «akimiyetiniñ» matbuat hızmeti «Sevgorvodokonal» müdiri Nikolay Peregudağa esaslanıp bildire, haber ete Krıminform.
64 mln kubometrni içinde sığdırğan suv anbarı şeer ealiniñ 70% teminley. Anbarda suvnıñ 40-50% olğan zamanda şeer teminlevini yerine ketirmek mümkün, – haber ete neşir.
«Sevteploenergo» malümatına köre, oktâbr 21 künü Aqyarda 39 qızdıruv tertibatı işke başladı, olar 994 ev, 29 bala bağçasını, 21 oquv yurtını, 12 hastahaneni qızdırmaqta. Bu aftanıñ soñuna qadar 114 şeer qızdıruv tertibatı işke başlaycaq.
