Çarşenbe künü, oktâbr 22-de, Eski Qırımda politsiya hadimleri Qurultaynıñ Merkeziy saylav komissiya reisi, qırımtatar faaliyetçi Zair Smedlâyevniñ qardaşını Tair Smedlâyevni yaqaladılar.
Qırım.Aqiqat sayıtna Zair Smedlâyevniñ aytqanı kibi, Tairni avto yolunda tuttılar.
«Maşinasını politsiya hadimleri taqip ete edi, oña toqtatmağa emir ettiler, soñra ise blok etip, özlerini tanıttılar. Soñra «Gazel» keldi, ellerini burıp, maşinağa oturttılar», – dey Smedlâyev.
Onıñ sözlerine köre, uquq qorçalayıcı organlarnıñ hadimleri Tair Smedlâyevniñ büyük oğlunı da yaqalamağa istegen ediler, amma bunı yapmadılar, çünki maşinada Tairniñ 4 yaşında olğan balası da buluna edi.
Qurultaynıñ Merkeziy saylav komissiya reisiniñ malümatına köre, adamnı Aqmescitniñ SİZOsına alıp keteler, şimdilik Tair Smedlâyevniñ bulunğan yeri belgisizdir.
Hatırlatamız, keçken afta Qurman qasabasında eki qırımtatarnı yaqaladılar. Olarnı qırımtatar milliy lideri Mustafa Cemilevni mayıs 3 künü Ermeni-Bazarda qarşılav tedbiri vaqtında uquq qorçalayıcı organlarnıñ hadimlerine zarar ketirgenine qabaatlaylar. İnsanlarnı Rusiyeniñ FSB SİZOsında tutalar.
