Yalta ve Aqyarda oktâbr 23-noyabr 1 künleri «Qırımnıñ inkişafı ve ilerilemesi içün yañı imkânlar – 2015-2026 ss istiqbali» adlı forum keçirilecek, mında avropalı mütehassıslarnıñ kelmesini bekleyler, haber ete Qırım.Aqiqat mühbiri.
Tedbirniñ iştirakçileri aytqanı kibi, forum çerçivesinde çetel yatırımcılarnıñ celp etilmesine yol tapılacaqtır.
Matbuat konferentsiyası devamında spikerler «Eko-2 – Eko-3» (ekonomika – ekologiya – ekonometriya) teşebbüsi aqqında tarif etecekler.
Forumda SWISSTEAMS GROUP (İsveçre) şirketniñ perzidenti, COFIPAG-AG yatırım birliginiñ prezidenti Tyerri Jan Sipyer, TSARR Cindynics Institute yetekçisi, filologiya, ticaret, iqtisadiyat ve maliye magistri Erik Godbill (Frenkistan), Yalta şeer şurasınıñ reisi Valeriy Kocarev, Milliy havfsızlıq institutınıñ reisi Aleksandr Şçurik, «Eko-2 Tsindiniks» forumnıñ teşkil komiteti reisi Yevgeniy Pohilük (Qırım), SWISSTEAMS GROUP halqara alâqalarnıñ inkişaf bölüginiñ başı Yakov Slutskiy ve «Eko-2» cemaat teşkilâtınıñ prezidenti Nadejda Levçenko iştirak etecekler.
2014 senesi martnıñ 16-nda Qırım ve Aqyarda yarımadanıñ statusınen bağlı referendum ötkerildi, onıñ neticelerine köre, Rusiye Qırımnı kendi terkibine kirsetti. Ukraina, Avropa birligi, AQŞ bu saylav neticelerni qabul etmediler, Rusiye Qırımnı işğal etti, dep sayalar.
