Link açıqlığı

Yusupov sarayı, Aluşta qoruğı ve Qırımdaki devlet yazlıq evleri Putin işleriniñ idaresine berildi


İşğal etilgen Qırımda işğalci akimiyet Ukraina prezidenti işleriniñ idaresinden olğan bir qaç devlet yazlıq evini Rusiye prezidenti işleriniñ idaresine berdi.

TASS malümatına köre, Rusiye prezidenti işleriniñ idaresi Köreizdeki Yusupov saray-bağça kompleksi ve Aluştadaki Qırım tabiat qoruğını idare etecek.

Yusupov sarayı – tarihiy obyekttir, 1945 senesi Yalta konferentsiyasında İosif Stalin başlığında Sovet eyyetiniñ rezidentsiyası sayıla edi. Birazdan 4 sanlı devlet yazlıq evi statusını aldı. Mında KPSS merkeziy komitetniñ erbapları raatlana ediler. 2006 senesi kompleksni Ukraina prezidentiniñ devlet rezidentsiyası statusına çevirdiler. Ara-sıra mında resmiy körüşüvler ve konferentsiyalar ötkerile edi. Aynı vaqıtta, obyekt müdiri Mariya Petrova bildirgenine köre, Ukrainanıñ birinci sımaları sarayğa kelmey ediler, çünki mındaki havfsızlıq şaraitleri yahşı degildir – kompleksni acele tamir etmek kerek.

Bundan ğayrı, Rusiye prezidenti işleriniñ idaresine Qırım qoruq hocalığındaki av evi, gaspradaki №5 ve 7 rezidentsiyaları, ve №3 devlet rezidentsiyası berildi. İşler idaresiniñ strukturalarına daa altı şifahane ve eki bala şifahane lageri keçe.

«Ukraina prezidenti işleriniñ idaresine ait olğan Qırımdaki yaşlıq evleri Rusiyeniñ devlet ihtiyaclarında qullanılacaq», – dep yaza neşir.

2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Ne Ukraina, ne Avropa Birligi, ne de Amerika Qoşma Ştatları işbu rey berüvni tanımadılar.

XS
SM
MD
LG