Oktâbr 21-ne qadar Qırım, Donetsk ve Lugansk vilâyetlerinden köçip kelgen insanlarnıñ sayısı 423,4 biñ insanğa qadar arttı, dep bildire Ukraina Devlet fevqulâde vaziyetler yanındaki hızmetlerara koordinatsion ştabı.
Böylece, Qırım ve Aqyardan köçip kelgen insanlarnıñ sayısı 18 biñ 891 insannı, şu cümleden 5 biñ 298 bala, 1 biñ 352 saqat ve yaşlı adamlarnı teşkil ete.
Arbiy areketler keçirilgen Donbass ve Ukrainanıñ diger regionlarından 375 biñ 764 kişi, şu cümleden 115 biñ 337 bala, 76 biñ 178 saqat ve yaşlı adam (şu cümleden Donetsk vilâyetiniñ sıñırlarından tış köçmegenler – 60 biñ 231 kişi) köçip keldi.
Oktâbr 20-de Ukraina Yuqarı Radası «Memleket içinde köçip kelgen insanlarnıñ serbestligi ve aqqlarını temin etüv aqqında» Qanunnı qabul etti. Vesiqa insan aqqları, serbestlik ve memleket içinde köçip kelgen insanlarnıñ qanuniy menfaatlarına riayet etüvni belgiley.
Qanun maqsadı – memleket içinde köçip kelgen Ukraina vatandaşlarınıñ Ukraina Anayasası kefil etken aq-uquqları ve serbestligini temin etmektir.
Vesiqağa binaen, memleket içinde köçip kelgen insanlarğa vaqtınca mesken, emek yardımı, tasilni devam etmek imkânları, gumanitar, hayriye yardım sermiyasını celp etüv, şu cümleden halqara teşkilâtlar ve çetel memleketler tarafından yardım almaqta qol tutacaqlar.
Qanun İnsan aqqları, milliy azlıq ve milletlerara munasebetler meseleleri boyunca parlament Komiteti tüzetüvlerinen qabul etildi.
Halqara teşkilâtlar Ukraina parlamentiniñ mezkür qararına qol tuttı.
