Qırımda yol işaretlerini Rusiye qanunları boyunca tikleycek olalar, lâkin mesken yerleriniñ ukrain işaretlerini qaldıracaqlar, dep qayd etti Qırım naqliyat «naziriniñ» muavini Vâçeslav Petuşenko, dep haber ete e-Krım.
Onıñ bildirgenine köre, Qırımnıñ yol işaretleri Rusiyede olğan işaretlernen aynı olmalı.
Ukrain yol işaretleri aqqında «nazir muavini» böyle ayttı: «Mında bir de bir qarşılıq yoq – Qırımda üç devlet tili bar».
İyün ayında Qırım «spikeri» Vladimir Konstantinov Khırımdaki ukrain ve ingliz yol işaretlerini deñiştirmege teklif etken edi. Qırım «Nazirler şurası» işbu teşebbüske qol tuttı.
2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Ne Ukraina, ne Avropa Birligi, ne de Amerika Qoşma Ştatları işbu rey berüvni tanımadılar.
