«Referendum» ve Qırımnıñ Rusiye Federatsiyası terkibine kirgeninden soñ yarımadanı 500 nefer qırımtatarı terk etti, dep bildirdi Qırımnıñ milletlerara munasebetler ve sürgün olunğan grajdanlarnıñ işleri boyunca «Devlet komitetiniñ» reisi Zaur Smirnov, dep bildire RİA Novosti.
Onıñ fikirince, buña kütleviy terk etüv demezsiñ.
«Şunı ayta bilem ki, Qırımnı farqlı sebeplerden terk etken qırımtatarlarnıñ sayısı beş yüz insandan ziyade degil. Bazıları din ceetten, bazıları iş ya da aile vaziyetinden sebep kettiler. Qırımtatarlarnıñ Qırımdan kütleviy ketüvi aqqında aytmaq – ayıptır», – dedi Smirnov.
Onıñ bildirgenine köre, Qırım Rusiye terkibine qaytqan soñ, yarımadağa sürgünlikte qalğan qırımtatarlar avdet olıp başladılar. Onıñ malümatına köre, tahminen 50 qırımtatar qorantası Qırımğa köçti.
Qırımtatar Milliy Meclisiniñ reisi Refat Çubarov bildirdi ki, Rusiyeniñ Qırım işğalinden soñ yarımadanı 17-20 biñ sakin terk etti, olardan 7-8 biñ kişi – qırımtatarıdır.
Uquq qorçalayıcı teşkilâtlar Rusiye tarafından işğal etilgen Qırımda qırımtatarlarğa qarşı yapılğan basqı aqqında er daim aytalar. Birleşken Milletler Teşkilâtınıñ Ukrainada insan aq-uquqlarına riayet etüv aqqında soñki maruzasında Qırımdaki vaziyet, şu cümleden qırımtatar halqı vekillerine nisbeten basqı qayd etile.
BMT İnsan aqları boyunca idare Qırım akimiyeti ve Rusiye akimiyetine qırımtatarlarğa qarşı basqı, qorquzuv areketlerini toqtatmağa ve yarımadanıñ er bir sakinine esas aqlarını kefil etmege çağıra.
2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Ne Ukraina, ne Avropa Birligi, ne de Amerika Qoşma Ştatları işbu rey berüvni tanımadılar.
