Poloniya prezidenti Bronislav Komorovskiy bildirdi ki, işğal etilgen Qırımnıñ Ukrainağa keri qaytarılması Rusiyege qarşı cezalar lâğu etilmesiniñ esas şartlarından biri ola.
«Körgenimiz kibi, cezalar sıñırlı tesir eteler, lâkin müsbet, ve cezalar siyaseti ukrainlerniñ qarşılığını quvetleştirdi. Bütün Şarqiy Ukrainanı zapt etmek rus ğayesi kerçekleşmedi. Ebet, bunı Donbassta yaptılar, lâkin Harkov, Odessa ve bir çoq diger şeerlerde bu şey yoq», – dep ayttı Poloniya prezidenti.
Bundan ğayrı, onıñ qayd etkenine köre, al-azırda Avropa Birliginiñ umumiy mevamına qol tutmaq kerek, çünki yaqın zamanda onı «sınavlar beklemesi mümkün».
2014 senesi mart 16-da Qırım ve Aqyar şeerinde yarımada statusı aqqında «referendum» olıp keçti. Onıñ neticesinde Rusiye Qırımnı öz terkibine qabul etti. Ne Ukraina, ne Avropa Birligi, ne de Amerika Qoşma Ştatları işbu rey berüvni tanımadılar.
