Qırımnıñ öz başına ilân etilgen baş naziri Sergey Aksönovnıñ qayd etkenine köre, işğal etilgen Qırımnıñ «nazirler şurası» qırımtatar faali Reşat Ametovnıñ öldürüvini ögrenecek taqiqatçılarğa mukâfat bermege azır.
Bu aqqında Aksönov oktâbr 17-de ATR qırımtatar telekanalınıñ efirinde bildirdi, – dep yaza TASS.
Aksönovnıñ bildirgenine köre, al-azırda «Qırımnıñ uquq qoruyıcı organları daa dört qırımtatarınıñ ğayıp olmasını ögrene».
Onıñ aytqanına köre, bu işler rayon bölüklerinden taqiqat komitetiniñ idaresine berildi.
Qırımtatar faali Reşat Ametov Aqmescit merkezindeki Qırım nazirler şurasınıñ binası yanına Ukraina bayrağınen kelip, «referendumğa» narazılıq kösterdi. Onı 2014 senesi mart 3-te esir aldılar. Mart 15-te Ametovnıñ cesedi Qırımnıñ Qarasuvbazar rayonındaki ormanda tapıldı.
