Mahkeme mayıs 3-te qırımtatar halqınıñ lideri Mustafa Cemilevni qarşılav aktsiyası vaqtında politsiya hadimine ücüm yapılmasında qabaatlanıp FSB hadimleri tarafından yaqalanğan qırımlı Musa Apkerimovnı dekabrniñ 15-ne qadar apste qaldırdı.
İnsan aqları boyunca Qırım alan missiyası Facebookta bergen malümatqa köre, Musa Apkerimov içün ceza olaraq 2014 senesi dekabr 15-ne qadar asp cezası belgilendi.
«Aqmescit ş. Kiyev rayon mahkemesiniñ mahkemecisi Mihail Belousov şeklengen insannıñ qabaat tanığanına, em de aileniñ alı (ağır ayaqlı apayı olğanına) qulaq asmayıp, prokuraturanıñ fikri bar diye, Apkerimov azatlıqta şaatlarğa tesir etmemesi içün onıñ içün eñ ciddiy ceza belgiledi», – aytıla beyanatta.
Yaqalanğan insannı Rusiye Cinaiy Kodeksi 318-inci maddesi 2-nci qısmı boyunca «Ömrü ve sağlığı içün telükeli ola bilecek akimiyet vekillerine qarşı zorbalıq areketleri» cinayette qabaatlaylar, bundan sebep onı beş yıldan on yılğa qadar apske alına bile.
Lâkin mahkemede seslendirilgen malümatqa köre, politsiya hadimine ketirilgen zarar sağlıq ve ömür içün telükeli degil edi, – dep haber ete Qırım alan missiyası.
Qırım.Aqiqat bildirgeni kibi, Qırımtatar halqı Qurultayınıñ Merkeziy saylav komissiya reberi Zair Smedlâyevniñ bildirgenine köre, oktâbr 15-te aqşam mayıs 3-te qırımtatarlarnıñ lideri Mustafa Cemilevni qarşılağanı sebebinden Musa Apkerimov yaqalandı.
