Qırımda avtomobil mektepleriniñ sayısı yavaş-yavaş eksilecek.
Bunı Rusiye içki işler nazirliginiñ telükesiz yol areketiniñ teminlevi boyunca Baş idare yolbaşçısınıñ muavini Vladimir Şvetsov matbuat konferentsiyasında bildirdi, dep haber ete KrımMedia.
Onıñ aytqanına köre, Qırım avtomobil mektepleriniñ vaziyeti qıyın, çünki 2014 senesi avgust ayında litsenziyanı almaq içün yañı qaideler çalışıp başladı.
Yañı litsenziyanı almaq içün avtomobil mektepler GİBDD ile malzeme tehnikiy bazanı belgilemeli. Yañı talaplar arasında – 0,24 ga mahsus meydan, tibbiy donatmalar ve ilâhre. Em de er bir ocanıñ aliy tasili olmaq kerek.
Şevtsovnıñ bildirgenine köre, bugünge qadar Qırımda qayd etilgen 69 avtomobil mektepten iç birisi malzeme tehnikiy bazanıñ belgilemesi içün ariza bermedi. Aqyarda sekiz mektepten üçü ariza berdi.
